Hlan lioah uipi le uitum an rak um ti a si. Voi khat cu khual an tlawnnak lampi ah an nu cu a paw a fak i naungei ding a si. I dor nakding le an thei fawn lo.
An nu cu a paw a fak chin lengmang i tuarh lo hnu ah cakei kua an hei hmuh i cuka ahcun fa cu an hrin. An nu nih cun, “Hika zawn hi cakei kua a si lo maw, cakei a rak ṭin tikah a kan seh dih lai lo maw, ka i ṭhial ah a ṭha lai,” tiin an pa cu a hei ti.
An pa nih, “Um ko, kan chimhning in na tuah ahcun an kan seh bal lai lo,” a ti. An nu nih, “Zeitindah?” a hei ti. An pa nih, “Cakei a rak rat bakin na fale kha na ṭahter hna lai i, ziah na fale cu na ṭahter hna ka vun in ti lai i, cakei theih dingin, cakei sa an hawt ruangah ṭap ko hen cu tiah na rak ti lai.
Cu tikah kei nih a cu ngai aa ton thiam tak cu… cakei a rat lio a si ko khih ka rak ti lai nang nih na fale kha, ka fale ngam uh, ngam uh nan hawtmi cakei a ra ko khih, na pa nih an sehpiak hna lai tiah na ti lai,” tiah an nu cu a chimh.
A cu tlawmpal ah cun cakei cu a rak ṭin taktak. Uipi nihcun a fale cu a vun ṭahter hna i an pa nih cun, “Zeicahdah na fale cu na ṭahter hna,” a von ti.
An nu nih cun, “Cakei sa kan haw an ti i an ṭah ko hen cu…” a von ti. An pa nih cun, “Acu ngai a vaa ton thiam cu dah, cakei an rat lio a si ko khih,” a hei ti. Cakeipi nih cun an bia an theih tikah a ṭih tuk hna i a zam tak hna, ti a si.
Cuticun cakei cu a tli i, zawngte he an i tong. Cakei nih zawngte cu bia a hei ruah lengmang i bialam peh ah cakei nih cun zawngte cu an kua chungah uipi farual an umnak kong kha a chimh.
Zawngte nihcun, “A cu tluk na vanṭhat cu zarhkhat chung sa ei ding pei na ngeih cu,” tiah a ti. Cakei nih cun, “A cun nemmam cu… an fale rual nih cakei sa kan haw an ti i an pa nih a kan kawl lioah kan va phan sual i an pa nih cakei sa nan hawtmi cu atu a rak phan ko khih a ti thawng ka theih i, thih cu ka ṭih ve i ka zaam zokzok,” tiah zawngte cu a chimh.
Zawngte nih cun, “A cu na va hruh cu... nangmah cakei cu aho nih dah an in tei bal. Ra, keimah nih kan kalpi lai i na seh dih hna lai,” a ti i a kal pi.
Uitum nih cakei le zawngte an rat cu a hei hmuh hnai, “A ce! atutan cu cakei nih a kan seh dih cang ko lai hi ta, zawng bawtor pa nih pei a chimh i kanmah seh dingin an rak rat ko khi,” tiah an nu cu a hei ti.
An nu nih, kan ti rih hnek lai i a zam lo ahcun zei ti awk ṭha,” a ti. Uipi nih cun a fale cu a von ṭahter hna i an pa nih cun, “Kan nu zei ruangah dah na fale an ṭah hoi?” a hei ti an nu nih cun,” cakei sa kan haw an ti i an ṭah ko hen hi,” tiah cakei theih dingin a von ti.
An pa nih cun,” A cu nan vanṭhat cu! Cakei pi le zawngte an ra ko khih, cakei sa he zawng sa he nan ei lai hih,” tiah fak nawn in a von ti.
Cakei pi nih cuti an ti cu a theih i a ṭih ah lo pher a zam ṭhan. Zawngte nih cun cakei pi cu a dawi i, “Ka kawi cakei, ziah na zaam e,” tiah a hal.
Cakei pi nih cun, “Ziah, ka zaam lai lo, thih cu ṭih ve ko cu ta,” tiah a leh. Zawngte nih cun, “Uipi nih cun an tei bal lai lo e,” a ti i cakei pi cu a lem lengmang. A hnu ah cun cakei pi nih, “Asile kan mei ka peh lai i hmun khat ah kan kal lai,” a ti i an mei cu an peh.
Uitum nih Zawngte le Cakei pi an rak ṭhan cu a hun hmuh ṭhan i atu cu kan thih ni a si cang ko hi ta, atu cu an mei an peh i an rak rat ko khi tiah an nu cu lung rawk ngai in a chimh.
An nu nih an pa cu voi khat kan ti ningte in khan kan ti lai i an zam duh lo ahcun an kan seh ko lai ta a ti ve. Cakei le zawngte cu uisa kan ei cang lai ti phun khin an ra thluahmah, Uitum nih khan hmasa a tining bantuk te khan, “Ziah nau cu an ṭah hoi ee,” a von ti.
“Cakei sa an haw i an ṭah hoi ko hen hi,” tiah an nu nih cun a vun leh. Uitum nih cun, “um… kan hnulei i an rat lioah khan zawng bawtor nih a zampi manh i ka seh manh hna lo.
Atu cu an pahnih in ka phanh hna hlan lo, ka dawi cang hna lai. Ka fadawt le ṭahter ka siang ti hna lo… khoi kawl hna ning luau…” tiin a von i cerhro ciammam i cakei cu a thin phan tuk ah thih ngamh in a zam.
Zawngte cu cakei mei nih cu a dawh chih i thingpi ah aa su. Cakei nih cun a zam tak i thinghram ah lungfim loin a um.
Cu lioah cun uitumpi nih, “Khah… mifim te ra ko kun, na sa te cu hung kan dang ko kun,” tiin a seh i, an bu lei ah aa tlikpi ti a si.
xxxx Adong xxxx
Crd: CACC