Hlan lioah khin Than Cer le Man Bo an um, ti a si. Man Bo cu nuhmei fa a si i Than Cer cu a nu le a pa he a ummi a si. Ni khat cu an chung hnih in lo an kal i Than cer te nih khan mei an i ken lo.
Than Cer kha a nu nih Man Bo te lo ah mei luah a fial. Than Cer cu Man Bo te lo ah cun mei luah ah cun a kal, Man Bo nu nih cun, "Na pa na kan pek lawngah mei cu na luah lai," a ti.
Than Cer cu a va kir ṭhan i, "Napa na kan pek lawngah mei cu na luah lai an ka ti," tiah a nu le a pa cu a chimh hna. "Kan in pek ko hna lai an ti tiah va ti. Cun mei cu va luak zokzok," an rak ti.
Than Cer cu a va thli i an chimning tein cun a va chimh hna i mei cu a luah. Zanlei an tlun cun Man Bo te nufa cu Than Cer te inn ah cun an tlung colh.
Cuticun Sau nawn an um hnu ah an chung te in tiva ah an kal, hlei an vun zawh lio ah Than Cer nu cu Man Bo nu nih hlei cung in a nam i ti chungah a tla. Than Cer nu cu ngathaisawn ah a cang.
Than Cer cu Man Bo nu nih a nehsawh ngangai. A nu le a pa lo an kal kar ah Man Bo cu an rak umhter. Than Ceu nih Man Bo cu a puak i tiva lei ah cun a kalpi ṭheo, tiva an phak le cangka in Than Cer nih cun a nu cu a hei auh i a nu nih cun sathawthaw a pek ṭheo .
Cuticun a nu le a pa lo an kal fatin tiva ah cun a kal lengmang. Than Cer cu a titsa zong a ṭha chin thluahmah, Zanlei sang an rak tlun ah Man Bo nih cun a nu cu, "Ka nu ka u Than Cer cu a nu nih ngasa a pek peng, kei cu an ka pe duh lo," tiah a nu sinah cun a chimh.
Man Bo nu cu a thin a hung tuk i Than Cer nu kan that lai an ti. Than Cer nih khan a theih i tiva lei ah cun a va tli i, "Ka nu thah an in timh.
Cucaah ka nu, ka nu, va sum lei ah ka ti ahcun va hna lei ah na kai lai, va hna lei ah ka ti ahcun va sum lei ah kna kal lai," tiah bia a cah ta.
A thaizing cu Than Cer nu thah ah cun an kal. Than Cer cu an von auhter i, "Ka nu, ka nu va sum lei ah," tiin a hei auh i a nu cu va hnalei ah a kai i an that kho lo, Man Bo nu nih cun Than Cer cu a velh i au zokzok a ti i Than Cer nih cun, "Ka nu, ka nu, va hna lei ah!" a ti i vasum lei ah a kal ṭhan.
Cu ni cu an that kho lo. A thaizing kan va fuh ṭhan lai an ti kha Than Cer nih cun a theih ṭhan i a nu cu a va chimh ṭhan. A nu nih cun, "Ka fanu, an in velh lengmang i na sa a fak tuk, an ka thah ahcun ka sa hi na ei hrimhrim lai lo.
Ka ruh tu hi puan in na rak fun lai i na rak phum lai. Na phum in a zing sarihnak ah changvut dil kua kha na rak i put lai i ka ruh na pumhnak ah khan na rak veh lai," tiah Than Cer nu nih cun a ti ta.
A thaizing cu zing khuan in Than Cer cu a nu an auhter rih i Than Cer nih cun a von auh i a rak rat lioah fei in an khawh i a thi. A sa cu Than Cer le Man Bo kha an phurhter hna i Than Cer cu a thi dor khat hmanh nih a zuh lo.
Man Bo tu cu a phurhmi sa thi nih cun a pumpaluk in a neh dih, a zuh peng. Inn an phan i Than Cer nu sa cu an chumh. Than Cer nih cun a nu ei te nufa cu, "Va leng ko u.
Keimah nih sa cu ka rak bul ko lai," a ti i Man Bo te nufa cu an leng. Than Cer nih cun a nu sa cu a bul pah in, "Ka nu, ka nu, na zei can dah a hmin cang ee...." a vun ti.
“Ka fa ka fa, ka ke rek tiang ka hmin cang e” tiah a vun ti. Tlawmpal a ruah in, "Ka nu, ka nu, na zei tiang dah a hmin cang," a vun ti ṭhan i, "ka fa, ka tai tiang a hmin cang," a vun ti i Than Cer nih cun, "ka nu, ka nu, na zei tiang dah a hmin cang," a hei ti rih i a nu nih cun, "ka fa, ka fa, ka hngawng tiang a hmin cang," a vun ti.
Tlawmpal a ruah ah Than Cer nih cun, "ka nu, ka nu na zei tiang a hmin cang," tiah a hal ṭhan i a nu nih cun a chawn ti lo. Than Cer nih cun a hmin cang a ti i a cawi.
A nu-ei te nufa cu a va auh hna i cuticun rawl cu an ei. Than Cer nih cun a nu sa cu a ei lo. "A ruh lawng ka pe u," a ti i a ruh cu a khon i puante in a tuam i a phum.
A zing sarihnak ah cun changvut dil khua kha aa put i a ruh a phumnak lei ah cun a ruh cu a va veh. A ruh fun cu a vun sah i ṭhi he, hlawn he, kut khih he, tumbul he a rak um.
Tthi le tumbul, kutkhih cu aa tonh, aa hruk dih hna." Inn ah cun a va ṭin i Man Bo nu nih cun Than Cer cu a hmuh tikah, "Khuazei ah dah na laak, an firmi a si," a ti i a sik.
Than Cer nih cun, "ka firmi a si lo, ka nu ruh ka phummi kha ka va zoh i a ruh kha ṭhihlawn ah aa cang i a si ko," tiah a chimh. Man Bo nu nih cun, "Than Cer na nau zong na suiṭhi cu hlan ve," a hei ti. Than Cer nih cun Man Bo cu a hei hlanh i Man Bo nih a von i awih le cangka inn tlakhlum ah aa cang dih, ti a si.
Voikhat cu Than Cer le Man Bo cu lo an tuah veve. Than Cer cu a fel tuk i a lo zong kha a ṭha tuk. A fangvoi zong hi dong cancan an si i, a zil zong hi dong cancan an si. Man Bo cu a tha a thu tuk i a lo i a cinmi a fangvoi cu khaap cancan lawng an si i a zil zong aa kuaikaling dih, ti a si.
Voi khat cu siangpahrangpa le a miṭhi a lalaang pawl cu Than Cer le Man Bo te lo lei ah cun khual an tlawng. An ti a hal, an rawl a ṭam tuk cang i, Man Bo lo cu an hei phan.
Man Bo cu, "Na zil ra kan lawh," tiah an hei hal i a siang lo. An hei kal ṭhan i Than Cer lo cu an hei phan ve. Khual tlawng pawl nih cun Than Cer cu, "Na zil kan i lawh lai, kan rawl a tam tuk," an hei ti i, "lo uh, lo uh," a hei ti hna i amah nih khan a zil lak i a ṭha cemcem kha a va lawhpiak hna i a mehmehpiak hna i a pek hna.
Siangpahrangpa nih cun Than Cer cu a umtu, a ziaza le a cawlcanghning a zoh tikah a lung a tling ngangai. "Kan ṭhit colh lai," a ti i Than Cer nih cun a sining vialte kha a chimh dih. Siangpahrang pa nih cun, "Man Bo hal in kan in hal lai i nangmah tu kan in ṭhit lai," an ti.
Siangpahrangpa te cu nupi hal ah cun an kal i, "Nan fanu Man Bo kan in hal hna," tiah an va ti hna. Man Bo nu cu aa naum tuk i an khuapi tein, "kan fanu Siangpahrang pa nih a ṭhit lai” tiah a va thanh dih hna.
Than Cer cu an nehsawh chin lengmang cang "Nang cu an sinum, an nau umtu na si cang lai," tiah a va ti. A thaizing cu Man Bo cu an kalpi i Man Bo nu nih cun Than Cer cu, "Na nau na va thlah lai lo maw, zokzok in i tim," tiah a vun sik pah.
Than Cer cu Man Bo thlah ah aa thawh i hla nawn an phak in khin Than Cer tu an i tlunpi i Man Bo tu cu an kirter ṭhan. Zan tlai nawn a si cang. "Ka nu, ka nu, innka rak ka hung uh," a ti len nain, Man Bo nu nih cun Than Cer ah a ruah i inn ka cu a hung duh lo.
Man Bo cu ṭah pah in, inn ka rak ka hung ko uh, Than Cer ka si lo, nan fanu Man Bo ka si," tiah ṭah pah in innka cu a kingh lengmang. Man Bo nu nih cun inn ka cu a hei hun i, "Ka fanu, zeitindah a si, na rak kir ning?" tiah rak hal.
Man Bo nih cun, "Lam hla nawn kan phak khin, nang cu kan in ṭhitmi na si lo Than Cer tu pei ka ṭhitmi cu a si ko cu. Nang cu va kir cang an ka ti i an rak ka dawi i ngaihchia buin ka rak kir," tiah a nu cu a chimh.
Man Bo nu cu a thin a hung tuk i, "Than Cer cu ka thah hrimhrim lai, a cu mi va te hna va chuh cu...,” a ti i khua a khang. Man Bo nu nih cun Than Cer cu "Na pa a thi, rak tlung zokzok," tiah bia a hei cah.
Than Cer cu ka pa a thih ṭung tiah khua tlun ah aa tawh i an khualu in hitihin hla a vun sak pah. “Ka pa nung lai le mang kon, khuangte pingping a bengh lai, ka pa thih lai le mang kon, kan inntual ah mei te khu iang mang lai..” a hei ti. A sullam cu ka pa a nun ah cun ka ṭhingṭhang ah khuangte a bengh lai tinak a si. Ka pa a thih ahcun kan inntual ah mei a khu lai tinak a si.
An khualu in cun a hei zoh i a pa cu an ṭhingṭhang ah khuangte a rak i tum i a rak laam lengmang ko khi a hei hmuh tikah Than Cer cu ka pa a thih ṭung lo, an ka hlenmi pei a si ko hi a ti i, a kir ṭhan.
Voi hnih voi thum cuticun Man Bo nu nih a cah lengmang i Than Cer nih cun an khualu in a hei zoh ii a pa khuangte aa tum i a lam lengmang cu a hei hmuh i a kir taak ṭhan lengmang hna.
Man Bo nu nih cun a hei cah ṭhan i an khualu in a hei zoh ṭhan hna. An khua pitarnu meikhu kha ka pa a thi taktak ko hi ta a ti i khua ah cun a hei lan. Man bo nu nih cun Than Cer toihnak ah tisa a rak so.
An innchung a luh hlan ah khin Man Bo nu nih cun, "Than Cer na pa nih inntang ah samthih a thlak sual i hei char ta," a ti. Than Cer cu kawmtang a luh lioah Man Bo nu nih cun tisa a khinmi in cun a toih i a thi, ti a si.
Man Bo nu nih cun Than Cer thuam in a thuam law va kal a ti. Man Bo cu Than Cer thuam in a thuam i a va tlung. An bawile nih khan Than Cer a si lo kha an rak hngalh.
Asinain Than Cer bantuk te khan an rak zohkhenh. Man Bo cu a tha a thu tukmi a si i zeihmanh a huam lo. Than Cer bantuk in ṭuan le rel zong a huam lo. Man Bo cu thiam an tahter i thiam tah zong cu a thiam hoi lo.
Thaimfung a von khawh ah khin "runrun rekrek, porhsuak porhsuak" tiah a von khawh. Vate nih, "Bu cung kha hna tang ah chia, hna tang kha bu chungah chia," tiah a vun chimh tawn nain Man Bo nih cun a zeihmanh khi a thiam lo.
Voi khat cu Than Cer a hnuk um te kha langak nih a thiar i a bu ah a zuanpi i langak nih cun a camh i a nunter ṭhan. Cuticun Pu Ak nau a um tawn, ti a si. Pu Ak naute cu a puak i hitihin hla in a awih tawn
“A hlan ah cun, a hlan ah cun, A lal nupi ka rak si. mitkuh par in ka rak par, senri en in ka rak en. A tu ah cun, a tu ah cun langaak pa fa ka rak um, a til urut lam a to, a zang ur-ut liam ka lo....” tiah hla in cun a nau langaak fa cu a awih tawn.
Nikhat cu Siangpahrang pa i miṭhi le a lalaang pawl cu ram kan vai lai an ti i ramlak ah cun an kal. Khaan kan hot lai an ti ah khin an chak thingpi kung in nau awih thawng an theih. "Ngai rih u, ngaih rih u, a cu aw te cu.... nau awih thawng pei a si," an ti an vun ngaih ṭhan.
"A hlan ah cun, a hlan ah cun, “A lal nupi ka rak si. mitkuh par in ka rak par, senri en in ka rak en. A tu ah cun, a tu ah cun langaak pa fa ka rak um, a til urut lam a to, a zang ur-ut liam ka lo....” tiah hla in cun a nua langaak fa a awih thawng an theih.
An von ngaih deuh i Than Cer aw te a si kha an theih. Kan tlun tikah ahohmanh nih hi kong hi kan chim lai lo. Kan chim ahcun kan bawipa nih a kan laakter ding a fiang ko an ti.
An hawipa hi bia a duh tukmi a um cu pa cu cu kong cu chim citcet lo dingin bia an tiam ta. Tlawmpal an vun kal ah khin a chim ko lai an ti i an i velh cia chung. Inn an von phan taktak i a cu pa cu a um thiam taktak ti lo.
“Ei! tu chun te kha...” a von ti i hawipa nih a vun sih ṭheo nain a holh aa sum kho ṭheo lo, “ei! tu chun te kha..” a von ti lengmang tikah an bawipa nih cun a theih i, “zeidah, tuchun i nan tonmi cu zeitindah a si, ka chim u,” a ti cang hna.
“Tu chun ah kan tonmi cu khaan kan hot lioah kan chak thingpi kung in nau awih thawn kan theih i a si ko,” an ti. An bawipa nih cun, “Zeitindaah a awnh?” tiah a hla hna,
“A hlan ah cun, a hlan ah cun, A lal nupi ka rak si. mitkuh par in ka rak par, senri en in ka rak en. a tu ah cun, a tu ah cun langaak pa fa ka rak um, a til urut lam a to, a zang ur-ut liam ka lo.... tiah hla in cun a nau langaak fa cu a awih,” tiah Siangpahrangpa cu an chimh.
An Siangpahrangpa nih cun, “Va la zokzok uh,” tiah a fial hna i a laak ah cun an i thawh. Thingkung tang in cun an hei auh i, “Kan in tlunpi lai, kan bawipa nih va la uh an kan ti,” tiah an hei ti.
“Keimahnawl a si lo e.. ka Pu Ak nih a ka nunter i ka Pu Ak nawl a si lai,” tiah Than Cer nih cun a leh hna. “Ka Pu Ah khi va hal ko uh,” a ti hna. Langak sinah cun an va kal i Langak nih cun, “A cu a si le hnap khir pawng khat le mit ek pawng khat nan ka pek khawh ahcun nan i kalpi khawh,” a ti hna.
An mit ek le an hnap khir an khoih cio i Pu Ak cu an pek. Than Cer cu an i tlunpi khawh. An bawipa nih, “Nupi pahnih cu a si kho lo,” a ti Man Bo le Than Cer cu a auh hna. Cun, “Nam in nan i sat lai i aa tei paoh ka nupi nan si lai,” a ti hna.
Man Bo cu thing in siahmi namte khi a tleu taktak in si an thuhpiak i an pek. Than Cer nam cu a har taktak in an tat i umnang an thuh i an sahter hna. Man Bo nih cun, “Than Cer ka saat, ka sat tlam phut,” a hei ti i Than Cer nih cun Man Bo liang cu thlam phut in a hei sah.
Than Cer nih cun, "Man Bo, ka sat ka sat tlam phut," a hei ti ve. Man Bo nih cun a hei sah ve i Than Cer cu a zei a poi lo. Man Bo nih cun, “Than Cer, ka sat, ka sat tlam phut,” a vun ti rih.
Than Cer nih cun a liang khat te lei khi tlam phut a hei sah rih ti a si. Than Cer nih cun, “Man Bo, ka sat, ka sat tlam phut,” a vun ti ve ṭhan i, Man Bo nih cun a hei sah ve i a namte cu a kiak colh i Than Cer nih cun a thah colh, ti a si.
Man Bo sa cu ralca chungah an thut i a thu cang lai an ti ah khin a nu le kha an hei cah hna. “Ka nu, nau kan ngei, rak kan tlawng,” tiah an hei cah hna. “Ka fanu Man Bo ka tlawng lai,” a ti i Man Bo nu cu aa thawh.
An khua cu a va phan. A nu nih cun Than Cer cu a hmuh i a fanu Man bo ah khan a rak ruah. Va ngeih pei aa ziak hi, a hnarbo zawng a bo ti lo, a hnarkiak zawng kha a kiak ti lo, tiin a ruah.
Aa naum tuk i nau a awih pah in hitihin hla aa sak pah, “A thlite in a mit bo kha bo ti beh, a hnar kiak kha kiak ti beh, a lak chuk ah zuang ka cang,” tiin nau cu a awih pah lengmang.
Sau nawn a umpi hna hnu ah ka tlung cang lai a ti i, “Ka nu kan sa thutmi kha i phurh ve,” a ti i a nu nih cun ralca khat in aa phurh ti a si. An khua a va phan i an inn pa chakthlang cu an rak chuak lulhmalh i Ralca um cu an vun hun. An vun i suah i pitar nu te nih, “A cu sathu cu e..
Man Bo kut he an i lo ee..” a vun ti, a vun suah ṭhan i, “a cu ke cu e, Man Bo ke he an i lo,” a vun ti rih. Man Bo nu nih, “a cu pitar nu ngai cu dah! amah Man Bo nih rawnh na lak ah,” a von ti.
Adang nih khan an von i suah lulhmalh cio i, “Ei! a cu lu cu dah, Man Bo lu he an i lo tuk,” an vun ti cio i an vun chuah taktak i Man Bo lu cu a rak si taktak. “Cu rimnam nu Than Cer, ka thah cang pei ti na lak ah, zeitindah a nun ṭhan hnga,” tiah Man Bo nu cu aa tuang, “ka va thah ṭhan hrimhrim lai,” a ti i namte kawngthuan he a pawhhnawh.
Than Cer nih cun khua a va phan lai i an vun zoh tikah a fa nu Man Bo a si kha a theih te ṭheo lai i keimah thah ah a ra te lai ti kha a rak theih i an inntual fungvei, bete, behrum, sangra, mumte, tbk. a nal deuhmi kha khat lakin a pho i a pawngah an uitum a hngahter.
Man Bo nu cu Than Cer te khua a rak phan i Than Cer i zeitindah a nun ṭhan ti kha a va hlat pah. Than Cer te inn lei ah cun a va kal. Than Cer cu an inn leng ah a rak ṭhu ko.
Man Bo nu nih cun a langhla in, “Than Cer, nangmah rimnam nu nih maw ka fanu cu na ka thahpiak, nangmah tu hi na sa le vawlei in cawh dih cang ning law!” a vun ti i an phomi cungah cun a vun zuanhnawh ciamman i fungvei lak le behrum, bete lakah cun a thalkadak in aa teng.
A cu chinchap lo ah an uitun nih a von zuanhnawh ciamman i Man Bo nu cu, “Than Cer ka chanh, ka chan, ka thi cang lai hih!” tiah a au i Than Cer nih cun, “kan chanh, kan chanh,” a ti i thiamtleng in a nolh chih i a thi, ti a si.
A ruak cu an dum chungah an phum i an phumnak zawn in khan anhling a kho. Than Cer cu thlano a hun thei i anhling lawngte kha a duh, ti a si. Anhling cu an va ṭawh i an chuan.
A vun tlawh bak ah khin a tlawh a vun i dang. "Pimpim porhporh, pimpim porhporh" tiah a tlawk i, "A cu kan tihang cu .. Man Bo nu a si ṭheo lai," an ti i pokhlet ah an thlet, ti a si.
An thletnak zawn ah khan sasua kung nganpi a kho ti a si. Voi khat cu an pa khualtlawn aa tim i chuncaw funnak ah tiin sasua hnah cu Than Cer nih cun a va lawh i namte aa ken lo caah sasua hnah hri te cu a ha in a vun ṭei i a thi, ti a si.
xxxx a dong xxxx
Crd: CACC