A hlan lioah Ngunnu le a nau an rak um. Voikhat cu Ngunnu nih, “Ka nau, lo kan kal lai,” a ti i a nau he cun lo an kal. Chun ni linh salingpi ah khin, “Ka nau a lin tuk, zil kan kawl lai,” a ti i zil cu an kawl.
A naunu nih cun zil sairaang a hmuh i a u tu nih cun zil kuaikalingte lawng aa hmuh. A unu nih a zil cu a ei i a dih colh.
A naunu zil sairaangpi cu a zoh i a mit a thi tuk. “Ka nau, na zil na ka cheu ve,” tiah a hal. A nau nih cun a siang lo. “Ka nau, na zil na ka cheuh lo ahcun chuntlung kaa senghter lai,” a ti.
A naunu nih cun, “Na duh le i senghter ko,” a hei ti. A unu nih cun, “Chuntlung aw, miseng, miseng, ka naunu nih zil a ka cheu duh lo,” a hei ti i a kerek tiang a sengh.
“Ka nau, ka cheu cang, ka kerek tiang a pil cang hih,” tiah a naunu cu a ti. A nau nih cun a siang hlei lo. A unu nih cun, “Chuntlung aw, miseng, miseng, ka naunu nih zil sairaang a ka cheu duh lo,” a ti ṭhan.
Chuntlung nih cun a khuk tiang a hei sengh. “Ka nau, rak ka cheu ko, ka khuk tiang a pil cang hih,” a vun ti. A naunu nih cun a cheu hlei lo.
“ Chuntlung aw, miseng, miseng, ka naunu nih zil sairaang a ka cheu duh lo,” a ti ṭhan. Chuntlung nih cun a tai tiang a phum cang. “Ka nau, hung ka cheu cang,” a hei ti rih i tlawmpal te khi a hei cheuh.
“Ka nau ka cheu rih,” a ti ṭhan. A nau nih cun a cheu siang ti lo. A unu nih cun, “ Chuntlung aw, miseng, miseng, ka naunu nih zil sairaang a ka cheu duh lo,” a hei ti ṭhan. Chuntlung nih cun a thin tiang a sengh cang.“Ka nau, na zilte cu ka cheu ko mu,” a vun ti. A nau nih cun a cheu siang hlei lo. A unu nih cun, “Chuntlung aw, miseng, miseng,” a ti ṭhan i a hnawng tiang a dolh cang.
“Ka nau, ka cheu ko,” a ti nain a siang hlei lo. Chuntlung cu a auh ṭhan i a khabe tiang a dolh. “Ka nau, rak ka cheu cang,” a ti. A nau nih cun a pelte a hei cheuh ṭhan.A unu cu aa za hlei lo, a vun hal ṭhan. A naunu nih cun a siang ti lo. “Chuntlung aw, miseng, miseng, ka nau nih zil sairaang a ka cheu duh lo,” a ti i a pumpuluk in chuntlung nih a sengh dih i vawilei chungah a pil. A naunu cu a ngaichih tuk i a lunglen in a ṭap zungzal.
Voi khat cu a ṭah lioah a cung in vaca an rak zuang. A naunu te nih cun, “Ka cung i va ca zuang zuang…. ka u Ngunnu nan hmu lo maw?” a hei ti hna.Vaca ruun nih cun, “A hmuh cu kan hmuh nain thlang ah thlang ah naa ek, caw ek a thai lio ee,” an ti. A dang ruun khat an ra ṭhan i, “Ka cung i vaca zuang zuang, ka u Ngunnu nan hmu lo maw?” a hei ti ṭhan.
A hmuh cu kan hmuh ko nain “Thlang ah, thlang ah naa ek, caw ek a thai lio,” an hei ti. Tlawmpal ah vaca run dang an ra ṭhan. “Ka cung i, ka cung i vaca zuang zuang, ka u Ngunnu nan hmu lo maw?” tiah a auh ṭhan hna. Cu vial ah cun “Ei! ka nau awte a lo ko e” a vun ti i tangah an ruun ning in an ṭum.
Ngunnu nih cun a hawile pawl kha, “Nan thla i phawi cio u law ka nau hi thla kan bunh lai,” a ti hna. An thla an phawi cio i Ngunnu a nau cu an bunhter i an zuanpi.
A unu nih cun, “Khah, ka nau, ka thla kan phawih lai i kan umnak lei ah kan zuang lai, kan zuan pah i tiva pi na hmuh ah cun ei, cu tiva te cu na ti lai. Tivate na hmuh ah cun ei cu tiva pi cu na ti lai,” tiah bia a cah.A u chimning tein tiva pi a hmuh caan ah a thin a phang i, “Ei! a cu tiva te cu,” a vun ti. Tivate a hmuh caan ah, “Ei! a cu tiva pi cu,” a hei ti.Sau nawn an zuan ah khin a u chimh mi kha a philh i tiva pi cung i an zuan lioah a thin a phang tuk i, “Ei! cu tiva pi cu …” a ti sual i tiva chungah cun a tla i ngapi nih a rak dolh, an ti.
xxxxxxxxxx A dong xxxxxxxxx
Crd: CACC